جرثومة المعدة

السلام عليكم ورحمة الله وبركاته 

كيفكم إن شاء الله دايماً تكونوا طيبين وبصحة حلوه 

صدقوني أجمل شي بالحياة انه الانسان يكون معافى

كثير حابه أشارككم تجربتي مع جرثومة المعدة من باب تثقيف المجتمع وراح أتبعها بمواضيع ثانيه تخص هذا الموضوع.

بالبداية : جرثومة المعدة أنواع وماراح أتكلم عن أنواعها لأني ماتعمقت وبحثت الا في النوع الي أصبت فيه

الي هي بكتيريا السلامونيلا المسببه للتيفوئيد أو الاشتباه بالتيفودئيد وقد تسبب مرض أخر

http://www.sfda.gov.sa/ar/food/awareness/news/Pages/Food-030511-AR1.aspx

الموقع هذا تبع هيئة الغذاء والتغذية ، حلو ومفيد وشارحين بالتفصيل كل شي .

الأعراض الي أصبت بها :

فقدان شهية 

إسهال

ترجيع

فقدان شهية

ألم بالمعدة شديد

(في بعض الناس تجيهم أعراض أخرى مثل الحمى والصداع)

الاسباب:

بكل بساطه الأكل الملوث الي يحمل هذي البكتيريا أو الغير مطبوخ أو ممكن تنتقل من الأشخاص الي مصابين بالمرض عن طريق البراز او غيره .

 الجرثومه بإذن الله لها علاج لكن ياخذ وقت طويل ممكن يصل ل ٦ أسابيع وبعد والي مصاب فيها لايصير خواف مثلي لكن طبعاً مهم العلاج والأهتمام .

بالبداية الأعراض بدأت بالتدريج وكان بدايتها ترجيع و إسهال الله يكرمكم وكان التشخيص وقتها نزلة معوية ، بعدها فقدان شهية وأخر شي ألم المعدة ووقتها أتحدد أنه فايروس بدون ذكر نوعه .

ألم المعدة هذا لوحده شي ثاني لدرجة إني ماقدر أنام وأبكي وماكنت تغفى عيوني إلا وأنا في حضن أمي وهذا أكبر دليل أن النفسية تلعب دور جداً جداً كبير وقت المرض ، وقتها صراحه كنت محبطه ومو طايقة نفسي كنت كل يوم أروح المستشفى عشان العلاج وكل يوم إبر وأحياناً أروح مرتين في اليوم هذا غير الإجهاد ، وصلت لمرحلة أحس أن محد عارفلي لأن وضعي طول تقريباً أسبوعين وأنا ما أشوف اي تحسن فيا لأني ماقد سمعت أن أحد أتسمم وجلس الفتره هذي كلها أو عانى نفس مشاكلي بعدها قررت أروح المستشفى أجلس فيها الين مايروح الي فيا .

عاد أول مادخلت قسم البطانيه لقيت تقريبا ٦ دكاترة باطنية والي على الرسبشن قالت أختاري دكتور ، قمت أنا رحت ألف في الدور أختار  الإسم الي يعجبني ههه ولقيت بروفيسور وقتها قلت أيوه هذا الي بيعرفلييي .

أول شي تم عمل مزرعة للبراز وبعدها ظهر أنه أشتباه بالتيفوئيد وأنا رحت بعدها سويت سيرش في قوقل وخفت زيادة وجاني مغص خلاني انتكس ، ياناس جوجل هذا جاب لي الهم من كثر مايقول معلومات مخيفه .

العلاج الي اعتمدته في البداية هو نفسة الي أخذته في المستشفى :

فلاجيل :لتطهير المعدة والأمعاء

بريمبران : للغثيان او الترجيع

بسكوبان : لأم وتقلصات المعدة

والمضاد الحيوي كان في نهاية العلاج 

الحمدلله أختفى الألم وجلست في المستشفى يومين مع الاستمرار على المضادات وجداً مهم بعد العلاج أنكم تعملو تحليل مره ثانيه عشان تتأكدو أن جسمكم نظيف لأن أنا بعد ماحسيت إني اتعافيت انتكست شويا وبعدها اكتشفت إني لسا أحتاج علاج للقضاء على الجرثومه ، وكثير زعلت من الدكاتره بسبب التشخيص الخاطئ و البروفيسور بسبب إهماله لي كمريضته .

حاجات لازم يعرفها المصاب أن العلاج يطول ولازم تصبر وتدعي ممكن تجلس شهرين وبعد الشهرين تحس أن جسمك هزيل ومرهق وقتها أنت تحتاج عناية بشدة من ناحية أكلك وتحتاج تغير جو .

ان شاء الله حكمل عن الاهتمام بعد التعافي من الجرثومة في التدوينه القادمة .

في النهاية أسأل الله السلامة لجميع المسلمين والحمدلله .