أسفنجة الكونجاك ♥ konjac sponge

أسفنجة الكونجاك ♥ konjac sponge

مصنوعة من نبتة الكونجاك  ، وأصل النبتة ياباني وتعتبر نوع من أنواع البطاطس ، تحتوي على الياف وفيتامينات.

طبعاً اليابانيين أول ناس أستخدموها وكانو يستخدموها لأجسامهم بالبداية وبعدين سارو يستخدموها للوجه لأنها جداً ناعمه وطرية وآمنه على بشرة الوجه .

مميزاتها وأستخداماتها:

- 100% طبيعية 

- لاتحتوي على مواد كيميائية

- تنظيف الوجة  

- أزالة الميك اب 

- تقشير للبشرة ( آمنه وماتخدش) 

- أزالة الجلد الميت والروؤس السوداء

- مناسبة لجميع أنواع البشرة بما فيها البشرة الحساسة 

-تحافظ على مستوى الPh للبشرة 

انتشرت عندنا من بعد مانزلتها شركة ايكو تولز ونزلت منها نوعين ، رغم انه في شركات يابانيه كثير توفرها بأنواع وأشكال مختلفه .

النوعين المتوفر حالياً بيننا من شركة أيكو تولز هي :

-الرمادية للتنظيف العميق وتستخدم لكل أنواع البشرة (تحتوي على الفحم)

-البيضاء للبشرة الحساسة 

طريقة الاستخدام:

 تحطيها تحت الموية الين مايتضاعف حجمها وبعدين تحطي الغسول عليها وتستخدميها  .

رأيي عنها :

بالبداية أستخدمت البيضاء المخصصه للبشرة الحساسه بما انه بشرتي نوعاً ما حساسه لتغير الأجواء أو في حال التعرض للغبار .

أستخدمتها لمدة شهر ونص ومن وقتها وقفت أستخدام الكلاريسونيك والمقشرات كنت أستخدمها في فترات متباعده عشان أشوف الفرق ، لأن اذا هي كانت بالفعل فيها هذي المميزات كلها أشوف أن الأفضل أبعد عن المقشر مره وحده .

وبصراحه ماحبيتها أبداً ، ماكانت تقشر وجهي و تزيل الجلد الميت ، حتى الروؤس السوداء سرت الاحظها في خشمي رغم أني الحمدلله مو مره اعاني منها ،وحتى فعاليتها في ازالة المكياج ضعيفه .

وبعدها اتخلصت منها لأني أشوف أن شهر ونص كثير على استخدام نفس الاسفنجة خصوصاً انها عرضه للبكتيريا هذا غير انكم راح تلاحظو انها راح تتلف أو تتأكل وبعدها بدلتها بالنوع الثاني الي هو الرمادي .

الرمادي أستخدمتها من 3 أسابيع وكان في فرق شاسع وبالفعل كانت تنظف وتزيل الجلد الميت ، وأغلب المميزات المذكورة أعلاه انطبقت عليها . 

حبيتها لكن ما أتوقع اني برجع أشتريها لأن الواحد يمل ويحب يجرب الجديد .

مقشر فرانك ♥ Frank coffee scrube

السلام عليكم ورحمة الله وبركاته 
وأهلين لكل الي يقرأ  ♥

[طبعاً هالفتره تواجدي بدأ يقل وكنت معطيه وعود بأني أنزل كل الريفيوهات الي نزلتها ع الانستقرام في المدونه لكن ماعننندي وقت بسبب الدراسه ،ومليت نوعاً ما من قلة التفاعل الموجود في الانستقرام :( لكن مستمره في اني افيد الناس بتجاربي ]

نجي لموضوع التدوينه الي هو {مقشر فرانك♥} < الكل طاح فيه بالفتره الاخيره رغم انه كان موجود من زمان وكنت اشوف بلوقرز اجانب يتكلمو عنه بس ماكان يلفتني  ، هو كان يفتقر لتسويق جيد من قبل الانستقراميين .

 أستخداماته و فوائده على حسب ماهو مذكور :
أنه يخفف من الاسترتش مارك ،السيلوليت ، الاكزيما ،الصدفية ، الدوالي ، حب الشباب والآثار ، ترطيب للبشرة الجافة 
المقشر مكوناته طبيعية ومافيه إضافات كيماوية ، المكون الأساسي فيه هي بذور القهوة والقهوة معروفة فوايدها للجسم  بالأضافة الى الزيوت وغيره .
عندهم 4 أنواع {كاكاو،اوريجينال،جوز الهند وبذور العنب ، نعناع }
كل واحد فيهم تختلف فيه الاضافات من ناحية الزيوت والريحة 
مناسب لجميع أنواع البشرات وفعاليتهم وحده لكن ( البشرة الحساسة تاخذ فرانك جوز الهند وبذور العنب )

طريقة الاستخدام :
يستخدم وأنتي تاخدي شور مثل أي صنفرة ،بحيث أنك تفركيه على جسمك وبعدين تخليه لمدة 5-10دقايق لين ماتحسيه نشف وتغسليه

لي تقريباً 3 شهور أستخدمة وخلصت 3 أكياس فرانك ومازلت مستمرة لأني سرت أشوف أنه من الاساسيات الي لازم تكون عندي .

ماكنت انتظر نتيجة من المقشر لأنه مستحيل تلاقي مقشر يحل أكبر مشاكل الجسم الي هي ( الاسترتش مارك والسلوليت )
لانه جلد واتشقق وصعب انك تعالجيه او حتى يخف بمجرد استخدامك للمقشر لوحده
بعض البنات يقولو انها تخف ( هي بس تتحول من اللون الاحمر للابيض وممكن تصغر  )

مابتكلم أكثر عن الاسترتش مارك لأني فاقدة الامل منها
لكن الوقاية خير من العلاج

بالنسبه للسلوليت حسيت بفرق بسيط لدرجة أنه لايذكر ، لأنه تحتاجي انك تخففي من الدهون وتعملي رياضه وروتين معين عشان تتخلصي من السلوليت وترى علاجه سهل بس يحتاج صبر

النتايج الي حصلت عليها :
أنه كان يخليني انبسسسط من ريحته وترطيبه وينعممم،لأنه بعد ماتغسلينه راح تحسي بطبقة دهنية لكن ما تلبد (مثل البيبي اويل لما تحطية على جسمك وهو مبلول وبعدين تغسليه ) ،
يعني الفايدة الوحيدة الي ممكن الكل يتفق عليها أنه يرطب ، وأكيد له فعاليه كمقشر للجسم بحيث انه ممكن يقشر خلايا الجلد الميت بفعاليه كبيره .

فرانك يستخدم كمان للوجه لكن أنا مانصح فيه أبداً لبشرة الوجه لأنه حبيبات القهوة الي فيه خشنه وممكن يخدش بشرة وجهك وتدخلي بمشاكل ثانية

وأخيراً العيوب :

أشوف أنهم مبالغين في وصف الفوائد الي ممكن تحصلي عليها وسبق ذكرت ان المقشر ماحيعطي نتايج جيده بمجرد استخدامة لوحده ولو لاحظتو أنه تجارب الاجانب تنعد ع الاصابع لكن ننتظر نتايج البلوقرز العرب .
ثاني عيب ، كميتة جداً قليلة مقارنة بسعره .

روتينك الشاوري مرتبط بتجنب مشاكل البشرة ♥

روتينك اليومي خلال الإستحمام ، بالعاده يقتصر على الشامبو وملحقاته ،والشور جل متبوع بالترطيب في الأخير .

لكن إهتمامك بدون وعي عن المنتجات الي تستخدميها ممكن يقلب ضدك خصوصاً مع أجوائنا وسوء التغذية وقلة شرب الماء وكمان قلة الترطيب عند بعض البنات .

بختص التدوينه اليوم عن بشرة الجسم وأختيار شور جل مناسب عشان تتجنبي جفافها ، لأن الجفاف هو السبب في أغلب مشاكل البشرة الي نعانيها مثل عدم صفاء البشرة لأي عرض كان مثل الحبوب والنقاط الحمراء .. الخ .

بالبداية لازم تعرفي أن البشرة لها درجة قياس هيدروجيني وقد يكون الأس الهيدروجيني حمضي أو قاعدي أو متعادل و

والبشرة تميل للحمضية وعشان تفهمي زياده أقري هذي المقالة (هنا)

وأول عدو قلوي هو الصابون لأحتوائها على هيدروكسيد الصوديوم ولو أستخدمتي صابون على وجهك  راح تحتسي أنه جف أو أتقشر (أنا هذي حالتي مع الصوابين) ، والشور جل ينطبق عليه نفس الكلام .

وبكل بساطه البديل هو انك تاخدي صابون مرطب أو شور جل مرطب ، وشركات كثير توفرها مثل دوف ،فازلين، وكمان بعض الشركات الفرنسيه .

لما جيت أخبر صحبتي على هذي المعلومة قالتلي بس مايرغي أو ينظف ؟ لا طبعاً لكن رغوة خفيف وهذا الشي الحلو لأن الرغوه لها تأثير سلبي ع البشرة وتقدرو تتعمقو عن الرغوة ومشاكلها (هنا) 

أستخدمي هذا النوع من الليفه حلو ويعطي كثافه للمنتج وأحسه يخليها ترغي غصب :P

أتمنى أنكم تستفيدو وأن شاء الله يجي يوم وأنزل فيه تدوينه عن مشكلة النقط الحمراء الي ممكن يكون سببها الكلام المذكور أعلاه وأول علاج أتباع الطرق الصحيه وأستخدام مرطبات ممتازه 

جرثومة المعدة

السلام عليكم ورحمة الله وبركاته 

كيفكم إن شاء الله دايماً تكونوا طيبين وبصحة حلوه 

صدقوني أجمل شي بالحياة انه الانسان يكون معافى

كثير حابه أشارككم تجربتي مع جرثومة المعدة من باب تثقيف المجتمع وراح أتبعها بمواضيع ثانيه تخص هذا الموضوع.

بالبداية : جرثومة المعدة أنواع وماراح أتكلم عن أنواعها لأني ماتعمقت وبحثت الا في النوع الي أصبت فيه

الي هي بكتيريا السلامونيلا المسببه للتيفوئيد أو الاشتباه بالتيفودئيد وقد تسبب مرض أخر

http://www.sfda.gov.sa/ar/food/awareness/news/Pages/Food-030511-AR1.aspx

الموقع هذا تبع هيئة الغذاء والتغذية ، حلو ومفيد وشارحين بالتفصيل كل شي .

الأعراض الي أصبت بها :

فقدان شهية 

إسهال

ترجيع

فقدان شهية

ألم بالمعدة شديد

(في بعض الناس تجيهم أعراض أخرى مثل الحمى والصداع)

الاسباب:

بكل بساطه الأكل الملوث الي يحمل هذي البكتيريا أو الغير مطبوخ أو ممكن تنتقل من الأشخاص الي مصابين بالمرض عن طريق البراز او غيره .

 الجرثومه بإذن الله لها علاج لكن ياخذ وقت طويل ممكن يصل ل ٦ أسابيع وبعد والي مصاب فيها لايصير خواف مثلي لكن طبعاً مهم العلاج والأهتمام .

بالبداية الأعراض بدأت بالتدريج وكان بدايتها ترجيع و إسهال الله يكرمكم وكان التشخيص وقتها نزلة معوية ، بعدها فقدان شهية وأخر شي ألم المعدة ووقتها أتحدد أنه فايروس بدون ذكر نوعه .

ألم المعدة هذا لوحده شي ثاني لدرجة إني ماقدر أنام وأبكي وماكنت تغفى عيوني إلا وأنا في حضن أمي وهذا أكبر دليل أن النفسية تلعب دور جداً جداً كبير وقت المرض ، وقتها صراحه كنت محبطه ومو طايقة نفسي كنت كل يوم أروح المستشفى عشان العلاج وكل يوم إبر وأحياناً أروح مرتين في اليوم هذا غير الإجهاد ، وصلت لمرحلة أحس أن محد عارفلي لأن وضعي طول تقريباً أسبوعين وأنا ما أشوف اي تحسن فيا لأني ماقد سمعت أن أحد أتسمم وجلس الفتره هذي كلها أو عانى نفس مشاكلي بعدها قررت أروح المستشفى أجلس فيها الين مايروح الي فيا .

عاد أول مادخلت قسم البطانيه لقيت تقريبا ٦ دكاترة باطنية والي على الرسبشن قالت أختاري دكتور ، قمت أنا رحت ألف في الدور أختار  الإسم الي يعجبني ههه ولقيت بروفيسور وقتها قلت أيوه هذا الي بيعرفلييي .

أول شي تم عمل مزرعة للبراز وبعدها ظهر أنه أشتباه بالتيفوئيد وأنا رحت بعدها سويت سيرش في قوقل وخفت زيادة وجاني مغص خلاني انتكس ، ياناس جوجل هذا جاب لي الهم من كثر مايقول معلومات مخيفه .

العلاج الي اعتمدته في البداية هو نفسة الي أخذته في المستشفى :

فلاجيل :لتطهير المعدة والأمعاء

بريمبران : للغثيان او الترجيع

بسكوبان : لأم وتقلصات المعدة

والمضاد الحيوي كان في نهاية العلاج 

الحمدلله أختفى الألم وجلست في المستشفى يومين مع الاستمرار على المضادات وجداً مهم بعد العلاج أنكم تعملو تحليل مره ثانيه عشان تتأكدو أن جسمكم نظيف لأن أنا بعد ماحسيت إني اتعافيت انتكست شويا وبعدها اكتشفت إني لسا أحتاج علاج للقضاء على الجرثومه ، وكثير زعلت من الدكاتره بسبب التشخيص الخاطئ و البروفيسور بسبب إهماله لي كمريضته .

حاجات لازم يعرفها المصاب أن العلاج يطول ولازم تصبر وتدعي ممكن تجلس شهرين وبعد الشهرين تحس أن جسمك هزيل ومرهق وقتها أنت تحتاج عناية بشدة من ناحية أكلك وتحتاج تغير جو .

ان شاء الله حكمل عن الاهتمام بعد التعافي من الجرثومة في التدوينه القادمة .

في النهاية أسأل الله السلامة لجميع المسلمين والحمدلله .

كيف تختاري واقي شمس جيد

السلام عليكم ورحمة الله وبركاته

كيفكم بنات

سبق ونزلت بوست عن واقي شمس يوسيرين والحمدلله أتوفقت في أختياره لكن كنت أجهل معلومات عن واقيات الشمس ومن يومين قرأت مقالة في جريدة الرياض ومصدر أخر ذكرته في الانستقرام والي هو الدكتور فهد عبدالعزيز المطوع  وحبيت أشارككم فيه .

بالبداية كنت أفكر ان نسبة ال SPF هي الي تدل على أنه الواقي بيحمي بشرتي من الشمس ويمنع التصبغات وأظن أن كثير منكم ممكن كان عنده نفس الاعتقاد .

من ضمن الواقيات الي كنت طايحة فيه هو بيوديرما لأن كان مكتوب عليه SPF 100 بسبب أن النسبة تغري P: >

أولاً ـ واقي الشمس يحميكي من الأشعة فوق البنفسجيه ونحتاج نوعين منها عشان تحمينا من مشاكل التعرض للشمس (اختصار الاشعة فوق البنفسجيه هو UV) :

1) أشعة فوق بنفسجيه أ (UVA) وهي الأهم والي نحتاجها في واقي الشمس لأنها هي المسؤولة عن التصبغات والتجاعيد وشيخوخة الجلد .
2) أشعة فوق بنفسجية ب (UVB) وهي التي تحمي الجلد من حروق الشمس وهي الSPF الي دايماً نشوفه وطايرين فيه .

والدراسات تقول أن نسبة الفرق بين SPF50 و SPF100 هي 1٪ ، وأن SPF15  يحمي الجلد بنسبة 93٪ و SPF30 يحمي بنسبة 97٪ .
وبذلك أي واقي شمس يبدأ من SPF30 يعتبر جيد .

أخر شي من المهم انك تقرأي المحتويات قبل ماتشتري واقي الشمس ، لاتهمك الماركه والتسويق الجيد لها يكفي أن تكون عندك معلومات تخليكي تختاري الشي الصح لأن بعض واقيات الشمس تحتوي على SPF فقط بدون UVA .

وبالنسبة لواقي يوسيرين يعتبر جيد ينطبق عليه كل الكلام المذكور أعلاه وفي نوعين منه (سائل وكريمي ) يوسيرين واقي يمنع وصول الماء يعني يمنع الوضوء والافضل تغسلي وجهك بالصابون قبل الوضوء ،وسبق ذكرت آن آغلب واقيات الشمس ممكن تقلب على أبيض رمادي  في حالة البشرة السمراء لكن تقدري تتحكمي باللون في أنك تحطي فاونديشن أو بيبي كريم ومهم انك تحطيه قبل ماتتعرضي للشمس بربع ساعه عشان مفعوله مايبدأ بسرعة .

أما الفاونديشن أو البيبي كريم الي يحتوي على SPF ماينضمن وجود UVA فيها فالأفضل أنك تحطي واقي الشمس .

أتمنى المعلومات تكون فادتكم مثل مافادتني .

مفضلاتي الجميله Loreal

السلام عليكم ورحمة الله وبركاته

كيفكم بنات 

ليا فتره ماعملت بوست يخص المنتجات المميزه لأني ماحسيت أني جربت شي واو
بس ليا مدة قصيره وأنا أستخدم هذي المنتجات وأدمنت عليها ، والغريب اني لما جيت أصور أكتشفت أنها كلها من ماركه وحده Loreal

يعني نادراً ماتصيب P:

المنتجات من اليسار :

١) مزيل الميك أب من لوريال رائع بصراحه وبديل ممتاز عن مزيل بيويرما بسبب السعر لأنه مايتعدى ال٣٠ ريال 
مناسب للبشرة الحساسه والجافه وليا تقريباً أكثر من شهرين أستخدمه وماحسيت بفرق عن بيوديرما .

٢) زيت لوريال للشعر في نوعين وكلها ممتازه وهو مستخلص من ٦ زيوت طبيعية ، يجنننن يجننن لأنه يخلي الشعر ناعم ويهديه من النفشه وسبق وأتكلمت عليه وعن كيفية استخدامي ليه في الموضوع السابق .


٣)فاونديشن لوريال نود ماجيك ، روعه وزعلانه انو بيخلص مناسب للبشرات الي مافيها عيوب التغطية من خفيفه لأقل من متوسطه، للأسف سبق وكتبت ان التغطيه جداً جداً خفيفه وصراحه وقتها فعلا كنت أحس اني مو حاطه شي في وجهي، بس مادري ليه أتغير فجأه (والله من جد)، الفنش تبعه بين المات والديوي وفيه حماية من الشمس لكن طبعا هالشي مايغنيكي عن واقي الشمس .

المنتجات تستحق الاقتناء وأسعارها في متناول الجميع 
مزيل الميك أب ٢٩ ريال متوفر بصيدليات النهدي
زيت لوريال ٥٠ ريال متوفر بصيدليات النهدي
فاونديشن نود ماجيك ٦٠-٨٠ ريال ، للأسف مو متوفر عندنا في الأسواق وبتلاقوه عند التاجرات أو أون لاين .

Instagram:3ahadksa

شامبو لوريال بزيت الارقان Loreal

السلام عليكم ورحمة الله وبركاته

كيفكم بنات , شلونكم شخباركم ان شاء الله تكونو طيبين <تقلد ارت ♥ فديتها عسل 

راح أتكلم عن شامبو لوريال بزيت الأرقان للشعر الجاف

بسميه الشامبو السحري 

أولا:  شعري دهني لكن جاف ,ناعم ! الفروة دهنيه لكن الاطراف جافه

بالعاده لما أتحمم وأطلع من الحمام وبمجرد ماينشف شعري اصير شوشه منكوشه لكن يبدأ يخف بعد مرور تقريبا ١٢ ساعه ويمكن أكثر ولما يتعدل وأفرح فيه يفاجئني بانه بدأ يزيت .

جربت شامبوهات كثيره وأكثر شي حبيته شامبو فيشي للشعر الدهني لأنه يعمل تحكم للدهون ومايخليها تفرز بسرعه وكان يخفف نفشة شعري , للأسف الشامبو سعره شوي عالي تقريبا ٩٩ ريال وانا شعري طويل وماكان يجلس معايا أكثر من أسبوعين فسرت استخدمه للضروره القصوى فقط .

وقبل ما أتكلم عن الشامبو حابه أقول اني ضد ان الوحده تعلق على شامبو واحد خلال الأسبوع يعني احب أنوع ،مره استخدم لوريال ومره فيشي ومره تريسيمي يعني لاتخلي شعرك يتعود على شامبو واحد لأنه ممكن بعد فتره مايعطيكي نفس النتايج .

 الشامبو والبلسم 

أول شي قبل لاتشتريه أتأكدي أنو مكتوب زيت الارقان عليه لأن في مجموعه ثانيه من لوريال نفس هاللون ماتفرقي بينهم .

والمميز في الشامبو والبلسم انو يحمي من الحراره يعني مو لازم تستعملي هيت بروتيكشن قبل السشوار.

♥♥♥

الشامبو له تأثير بشكل أكيد على النعومه وتخفيف نفشة الشعر وحتى البلسم 

لكن للأسف حسيت أنه البلسم خلى شعري يتساقط والسبب اني كنت استخدمه كل مره مع الشامبو ،

وهالشي غلط لأن البلسم كثرته تطيح الشعر وهذا الشي ينطبق على أي بلسم في الحياة 

وقفت استخدامه كل يوم ولاحظت ان التساقط تقريبا راح رغم انه كان له دور في تخفيف النفشه لكن مو مره 

الزيت 

هو أكثر شي كان ليه دور في نعومة الشعر وتخفيف النفشه

رووعه روعه رووووعه وعلى كثر ماحطيت مازيت شعري أبداً ولو خلص بشتريه مره واثنين وثلاثه.

له أكثر من طريقة أستخدام  ،ممكن قبل الحمام تحطيه أو بعد

أنا أحطه لما يكون شعري مبلل

(خطير مره)♥

بديل الزيت 

صراحه استخدمته مره وحده بس يعني ماقدر أحكم عليه وليه أكثر من طريقة استخدام ،

استخدمته قبل الحمام واضفت عليه ضغطتين من الزيت وخليته نص ساعه وبعدين غسلته .

في كل الحالات عجبتني النتيجه وأرتحت عليه الحمدلله 

سعر المجموعه كلها ١١٢ريال